مش حب عادي ٣٤ملك ابراهيم

رحيم اتكلم بلهفة وخوف عليها: انا عمري ما أتجوز عليكي يا حبيبة انا بحبك. لكن حبيبة مكانتش سامعه اي كلام.. حالة الانهيار اللي دخلت فيها كانت صعبه.. مش سامعه غير صوت رباب وهي بتقولها انها هتتجوز رحيم.. عقلها بيصور لها رحيم مع رباب. رحيم حس انها مش سامعاه.. او كلامه مش واصل لعقلها في اللحظة دي.. حاوط وشها بـ أيديه وهو بيبص في عنيها واتكلم بنبرة صوت قوية لكنها هادية.. ونطق كل كلمة لوحدها وهو بيبص في عنيها عشان توصل لعقلها.. رحيم: انا بحبك انتي وبس.. وعمري ما اتجوز غيرك.. الكلام اللي رباب قالتهولك ده مش حقيقي.. سمعاني يا حبيبة.. كلام رباب مش حقيقي.. انا مستحيل اتجوز غيرك.. انا بحبك انتي.. سمعاني؟؟ كلامه بدأ يوصل لعقلها لكن ببطئ.. عيونها كانت بتبص له والدموع بتنزل منها.. بدأت نظراتها تثبت على عنيه.. ورحيم بيهز راسه بالايجاب وهو بيأكدلها على كلامه.. وبيتابع عيونها اللي بدأت تهدا.. اتكلم مرة تانيه بهدوء وهو بيبص في عنيها: انا بحبك.. مستحيل اتجوز اي بنت تانيه غيرك. كلامه وصل لعقلها.. هزت راسها ونطقت بصوت ضعيف: والكلام اللي رباب قالته؟ رد بسرعه وهو بيبص في عنيها: مش حقيقي.. صدقيني.. انا بحبك انتي وبس. اتكلمت بصوت ضعيف: يعني مش هتتجوز رباب ؟ رد بهدوء: ولا رباب ولا غيرها.. انتي وبس مراتي.. وحبيبتي الوحيدة. وشدها لحضنه وضمها.. وهي كانت متجمده بين ايديه.. ضمها اكتر وقالها بصوت حنون: انتي أغلى من روحي يا حبيبة.. وعمري ما اجرحك او اكسر قلبك. وخرجها من حضنه وهو بيبص في عنيها وقالها: انتي مراتي وملكة قلبي.. انا بعشقك. حبيبة بصت له كام لحظة.. عقلها رجع يفكر ويستوعب كل حاجة حواليها تاني.. كأنها كانت غايبه عن الوعي ورجعت للحياة من جديد. اخد ايديها وقعدها على الكنبه وقعد قدامها.. رفع أيديه ولمس خدها ومسح دموعها.. مسد بـ أيديه على شعرها بحنيه وقالها: في واحد عاقل.. تبقى مراته بالجمال ده كله.. وبيعشقها وعمره ما حب غيرها.. ويفكر في اي واحدة تانيه؟ اتكلمت حبيبة بصوت ضعيف: ليه رباب قالتلي كده؟ رد عليها رحيم بهدوء: جدي طلب مني اتجوز رباب فعلا.. وانا عشان محرجش رباب.. طلبت من أنس وخديجة ياخدوها برا عشان متسمعش كلامي مع جدي.. واتكلمت معاه وعرفته اني مستحيل اتجوز على مراتي والموضوع منتهي.. وهو فهم وعرف ان ده مش هيحصل.. وكنت هتكلم مع أنس عشان يفهم رباب ان الكلام اللي جدي قاله مش هيحصل.. لأني محبتش احرجها انا واقولها كلام زي ده!.. بس متخيلتش انها هتيجي تقولك حاجة زي دي قبل ما تسمع ردي! اتكلمت حبيبة بحزن: وجدك عايزك تتجوز رباب ليه؟ هو مش معترف بيا ان انا مراتك ؟ ابتسم رحيم وهو بيرد عليها بحنيه: جدي مش بيعترف غير بالورث والأرض وعايز يضمن ان ورث رباب يفضل جوه عيلة الجبالي. شدها من ايديها وقعدها على رجله وكأنها بنته.. ضمها ليه وهو بيبص لها بعشق ولمس خدها بحنيه وقال: وانا ميهمنيش أرض ولا ورث.. انا يهمني اني اشوف مراتي حبيبتي قدام عيني مبسوطة ومرتاحه.. ومسك كف أيديها وباسها بحب وقال: انا ملكك انتي وبس.. ومستحيل اي واحدة تشاركك في قلبي. حبيبة ابتسمت بحب وهي بتبص له. رحيم اتكلم بنبرة مرحة: بس تعرفي.. كويس ان رباب قالتلك كده.. خلتني اعرف انتي بتحبيني قد ايه.. مكنتش اعرف انك واقعه فيا كده وبتحبيني للدرجة دي. بصت له بخجل وقالت: رحيم متفكرنيش بجد.. انا كنت حاسه ان قلبي هيقف من كتر الوجع اللي حسيته.. مقدرتش اتخيل انك تتجوز غيري وتكون معاها! رد وهو بيضحك: هو في راجل عاقل يتجوز مرة ويتجوز تاني؟! دا انتي لوحدك ومجنناني! حبيبة فتحت عنيها بدهشة وقالت برقة: انا مجنناك؟ رفع حاجبه وقال بنبرة مرحة: اه طبعا.. تقدري تقوليلي مين فينا اللي كان زعلان من التاني؟ مش انا اللي كنت زعلان والمفروض انتي اللي كنتي تصالحيني؟؟ شوفي دلوقتي ايه اللي بيحصل.. انا اللي عمال اصالحك ومقعدك في حضني وبدلعك! ردت بخجل: انا كنت هصالحك النهاردة.. بس فادية هي اللي جت نادت عليك عشان تنزل تحت. ابتسم وقال: خلاص احنا فيها.. اتفضلي صالحيني. حبيبة ابتسمت بخجل وقربت منه وباسته من خده بسرعه وبعدت. رفع حاجبه وهو بيمثل الدهشة وقال: ايه ده؟ اتكلمت حبيبة بخجل: صالحتك. عقد حواجبه وقال بنبرة مرحة: كده صالحتيني؟! دا تآثير قعدتك مع ليان بنت اختي صح؟ حبيبة ضحكت بخجل.. بص لها بغموض وقال: وبعدين تعالي هنا انا مش ناسي.. ايه حكاية البوس الكتير اللي عماله توزيعه ده؟؟ كل شويه الاقي ليان جايه تقولي طنط حبيبة باستني من هنا؟! طب وبالنسبه لـ خال ليان ايه؟ مش صعبان عليكي تحني عليه شويه هو كمان. حبيبة اتكسفت من كلامه وقالت بخجل وهي بتقوم من على رجله: رحيم أسكت بجد انت بتكسفني بكلامك ده. رحيم شدها عشان متقومش وقالها بمشاكسه: لا مش هتهربي مني.. انتي عارفه ان انا بغير.. صح ولا لأ؟؟ ردت حبيبة بخجل: طب ما انا كمان بغير عليك.. ولا فاكر ان انا مش واخده بالي من الست مايا وهي عماله تلف حواليك! رفع حاجبه بدهشة وقال: مين مايا؟؟ حبيبة بصت له بغموض وقالت بتحدي: بلاش طريقتك دي معايا يا حضرة المحامي..! رحيم ضحك وقام وهو بيشيلها بين ايديه وقال بعشق: انتي دوبتي حضرة المحامي فيكي.. عارفه انا بحبك قد ايه؟ حبيبة ابتسمت بخجل. هز راسه وقال بمشاكسه: تمااااام.. يعني مش عارفه.. حلو الكلام ده... بقلمي ملك إبراهيم. ... يتبع حبايبنا اتصالحوا أخيرا😍♥️ رحيم راجل جدع وعاقل عرف يصالح حبيبته 💪 منتظرة رأيكم في التعليقات حبايبي. وتفاعل حلو على البارت متنسوش ♥️💪