قصه تصرفات ابني الغريبة
لكن الدكتورة رفعت إيديها وقالت بهدوء
سيبيه متقربيش.
وقفت مكاني. فضلت هي تراقبه حوالي دقيقة كاملة وبعدها بصتلي وقالت من إمتى بيعمل كده؟
حكيتلها كل حاجة ، من أول يوم ، لحد الجملة اللي قالها
الست هناك.
الدكتورة سكتت شوية وبدأت تكتب كام كلمة في الملف وبعدها سألتني سؤال عمره ما جه في بالي.
قالت
مين بيقعد مع آدم غيرك؟
قلت بسرعة
أنا وأبوه.
هزت راسها وقالت
قصدي بشكل يومي.
افتكرت ساعتها.
وقلت في مربية بتيجي كل يوم أربع ساعات ، تقعد معاه لحد ما أرجع من الشغل.
رفعت عينها من الورق وبصتلي نظرة خلت قلبي يقع.
وقالت بهدوء شديد
والمربية دي بقالها معاكم قد إيه؟
قلت
شهر تقريبًا.
هنا قفلت الملف قدامها براحة وقالت
الجملة اللي غيرت طريقة تفكيرنا كلها
طيب وسلوك آدم بدأ من شهر تقريبًا صح؟
في اللحظة دي حسيت إن حد خبطني في صدري ، لأن لأول مرة أربط بين الحاجتين ولأول مرة أكتشف إننا كنا مركزين مع الحيطة وسايبين الشخص اللي دخل حياة ابننا في نفس التوقيت.
قالت الدكتورة وهي ميلة بجسمها لقدام
الأطفال في السن ده ميعرفوش يحكوا لكن أجسامهم بتحكي عنهم ، ساعات الطفل ميقدرش يقول حد خوفني ، أو حد أذاني ، فيبدأ يكرر نفس الحركة اللي كان بيعملها وقت الخوف ، لأن مخه الصغير ربط بينها وبين النجاة.
ساعتها جوزي اتنهد وقال
حضرتك تقصدي إن حد ممكن يكون
قاطعت كلامه بهدوء
أنا لسه مقصدش حاجة لكن لازم تعرفوا إن أي تغير مفاجئ في سلوك طفل بعد دخول شخص جديد حياته يستحق يتراجع بدقة.
خرجنا من العيادة وإحنا ساكتين ، الطريق كله محدش فينا نطق بحرف وكل واحد كان بيهرب من الفكرة اللي بدأت تكبر جواه ، لحد ما وصلنا البيت وكانت المربية قاعدة مع آدم كعادتها وما إن رفع عينه وشافها ، حتى اختفت الضحكة من وشه في لحظة واتحولت ملامحه لملامح طفل مرعوب وبدأ جسمه الصغير يرتجف وبعدها جرى بأقصى سرعة ناحية نفس الحيطة ولزق وشه فيها وفضل يعيط عياطًا عمرنا ما سمعناه منه قبل كده ، عياط طفل بيستخبى مش طفل بيتدلع.
ساعتها أنا وجوزي بصينا لبعض.
ومن غير ما نتكلم فهمنا إن اللي قالته الدكتورة مكنش مجرد احتمال.
لحد ما اكتشفنا بعد يومين إن آدم ماكنش بيبص على الحيطة عشان فيها حاجة
كان بيبص عليها عشان
يهرب من حد.
راجعنا تسجيلات الكاميرات القديمة اللي كانت في أوضة الطفل ، التسجيلات اللي عمرنا ما فكرنا نفتحها ، لأننا كنا واثقين في المربية ثقة عمياء والبنت كانت هادية ومؤدبة وبتتكلم بأدب وكل اللي يعرفها كان بيقول إنها ملاك.
