داليا

داليا كانت واقفة قدام المراية الصبح بتحاول تظبط الطرحة بتاعتها وايدها بتترعش من التوتر. النهاردة اهم يوم في حياتها. انترفيو في شركة كبيرة جدا في القاهرة الجديدة. شركة احلام اي بنت خريجة تسويق. كانت لابسة بدلة سودا شيك وجايبة القهوة بتاعتها في كوباية ورق عشان تصحصح. ساره صاحبتها الانتيم كانت بتكلمها فيديو وبتقولها يا بنتي اهدي بقى هتتقبلي ان شاء الله انتي اشطر واحدة. داليا قالت لها يا ساره انا حاسة اني هرجع اعيط انا مش مستعدة. ساره ضحكت وقالت لها يا داليا انتي اللي كنتي بتعملي بريزنتيشن قدام الدفعة كلها من غير ما تتهزي دلوقتي خايفة من انترفيو. فرح بقى كانت بعتالها فويس نوت بتقولها متشربيش القهوة كتير هتتوتري اكتر. داليا قفلت معاهم ونزلت جري على الشارع. ركبت اوبر وطول الطريق عمالة تراجع السي في بتاعها والاسئلة اللي ممكن تتسألها. وصلت قدام البرج الازاز الكبير اللي فيه الشركة. دخلت وهي حاسة قلبها هيطلع من صدرها. الامن قال لها الدور التمنتاشر. راحت وقفت قدام الاسانسير تستناه. الاسانسير اتأخر وهي عمالة تبص في الساعة. القهوة في ايدها هتبرد. مرة واحدة الباب اتفتح وكان زحمة. دخلت بالعافية. كان في شاب طويل لابس تيشيرت اسود وبنطلون جينز ودقنه خفيفة وشكله مستعجل وبيتكلم في التليفون وبيقول يا يوسف يا يوسف بقولك الميتينج ده لازم يتأجل انا مش فاضي دلوقتي. داليا اتضايقت لان صوته كان عالي والاسانسير ضيق. قالت في سرها ايه الناس اللي معندهاش ذوق دي. الشاب ده كان عمر. عمر صاحب الشركة اصلا بس محدش يعرف شكله لانه مبيحبش يتصور ومبيحبش الرسميات. هو كان نازل من الجيم وطالع ياخد حاجته بسرعة وينزل تاني. الاسانسير طلع مرة واحدة ووقف فجأة واترج جامد. داليا اتخضت والقهوة اللي في ايدها طارت وادلقت كلها على تيشيرت عمر الاسود. الدنيا سكتت ثانية في الاسانسير. عمر بص على التيشيرت بتاعه اللي باظ وبص لداليا وهو مصدوم. داليا شهقت وقالت ايه ده انا اسفة والله ما اقصدش الاسانسير هو اللي اترج. عمر كان لسه ماسك التليفون وقال يا نهار ابيض. بص لها بصة غريبة وقال انتي مش واخدة بالك انتي عملتي ايه. داليا من التوتر والكسوف اتحولت لواحدة تانية وقالت وانت اللي واقف مش واخد بالك وبتزعق في التليفون كأن الاسانسير بتاعك لوحدك. عمر استغرب جدا. محدش كلمه بالطريقة دي قبل كده. قال لها على فكرة انتي اللي دلقتي عليا القهوة مش انا. داليا قالت له وانت اللي خليت الاسانسير يقف بطاقتك السلبية دي. الناس في الاسانسير بدأت تضحك. عمر حس انه عايز يضحك بس مسك نفسه. قال لها طب ممكن تهدي. داليا قالت له لا مش ههدي وانت لازم توسع كده عشان انا متأخرة. عمر قال لها على فكرة انا كمان متأخر. الاسانسير اتحرك تاني. داليا كانت حاسة انها عايزة الارض تتشق وتبلعها. التيشيرت بتاعه بقى شكله يقرف وهي رايحة انترفيو مهم. اول ما الباب اتفتح في الدور التمنتاشر جريت بسرعة وقالت له ابقى اغسل التيشيرت كويس. وخرجت. عمر فضل واقف متنح. حس ان البنت دي مجنونة بس مجنونة حلوة. نزل الدور اللي بعده واتصل بيوسف صاحبه والشريك بتاعه وقال له يا يوسف في بنت مجنونة دلقت عليا قهوة في الاسانسير وشتمتني ومشيت. يوسف ضحك وقال له تستاهل عشان انت اللي على طول مكشر. عمر قال له لا بجد البنت دي فيها حاجة شدتني اول ما شفتها حتى وهي بتتخانق. يوسف قال له يا عمر انت اتجننت ولا ايه انت بتحب من اول خناقة. عمر ضحك وقال له شكلها كده.