داليا
داليا روحت البيت وحكت لساره كل حاجة. ساره كانت هتموت من الضحك وقالت لها يا لهوي يا داليا انتي دلقتي قهوة على صاحب الشركة في الاسانسير واتخانقتي معاه انتي مش طبيعية. داليا قالت لها يا ساره انا انتهيت خلاص مش هيقبلوني. ساره قالت لها بالعكس ده شكله اعجب بيكي. داليا قالت لها يعجب بمين ده انا شتمته. عدى يومين ومحدش كلمها. داليا قالت خلاص شكرا. في اليوم التالت لقت تليفونها بيرن رقم غريب. ردت لقت ريان بيقول لها مبروك يا داليا اتقبلتي معانا تقدري تيجي بكرا تمضي العقد. داليا صرخت من الفرحة وقفلت مع ساره وفرح وعملوا زغاريط في التليفون. تاني يوم راحت الشركة وهي مبسوطة جدا. استلمت مكتبها وكان جنب مكتب فرح اللي اتقبلت برضه. بقوا صحاب جدا. اول يوم شغل عدى عادي ومشافتش عمر خالص. قالت الحمد لله شكله مش بيجي كتير. بس تاني يوم وهي قاعدة مركزة في شغلها لقت حد حاطط كوباية قهوة على مكتبها. بصت لقت مكتوب عليها معلش القهوة دي مش هتتدلق. بصت حواليها لقت عمر واقف بعيد وبيضحك. داليا اتنرفزت وقامت راحت له وقالت له انت بتعمل ايه. عمر قال لها بعتذر بطريقتي. داليا قالت له شكرا بس انا مش بشرب قهوة في الشغل. عمر قال لها خلاص اشربيها في البيت. وبدأ من هنا جنان عمر. كل يوم يبعت لها حاجة. مرة ورد. مرة شوكولاتة. مرة يخلي يوسف يبعت لها ملف ويكون هو كاتب لها ملاحظة جواه. داليا كانت كل مرة ترفض بطريقة شيك بس بكبرياء. تقول له يا استاذ عمر احنا هنا في شغل. عمر يقول لها وانا بتكلم في شغل برضه. ساره كانت تقول لها يا بنتي ده واقع فيكي بجد ده صاحب الشركة وبيجري وراكي. داليا تقول لها وانا مش بحب الطريقة دي انا عايزة حد يحترم دماغي مش يطاردني كأني جايزة. فرح كانت شايفة كل حاجة وبتقول لداليا على فكرة عمر طيب جدا وكل الناس بتحبه بس هو عمره ما عمل كده مع حد.
في مرة كان عندهم بريزنتيشن مهمة جدا مع عميل كبير. داليا كانت هي اللي هتقدم. كانت محضرة كل حاجة. عمر كان قاعد في اخر القاعة. وهي بتتكلم النور قطع فجأة. الناس اتخضت. داليا وقفت ثانية وبعدين فتحت كشاف الموبايل وكملت كلام بمنتهى الثقة كأن مفيش حاجة حصلت. عمر كان مبهور بيها. بعد ما النور رجع والعميل مشي وهو مبسوط جدا. عمر راح لها وقال لها انتي هايلة بجد. داليا ابتسمت لاول مرة قدامه بجد وقالت له شكرا. عمر حس ان الابتسامة دي فتحت قلبه. قال لها ممكن نخرج نتكلم برا الشغل خمس دقايق بس. داليا فكرت وقالت له لا. عمر قال لها ليه. قالت له عشان انا مش عايزة الناس تقول اني اتقبلت عشان حاجة غير شغلي. عمر احترمها جدا وسكت.
