فيروز وزين حصري علي صفحات
ولما وصل لكلمة:
— قالّي يا عمو…
إيهاب ما قدرش يمسك نفسه، ضحك بصوت عالي:
— ياااه 😂 عمو؟!
والله صعبة دي!
زين ضرب المكتب بإيده:
— إنت بتضحك على إيه؟!
إيهاب وقف ضحكته بسرعة:
— خلاص خلاص… حقك عليّ.
قعد قصاده، وصوته بقى جدي:
— بص يا زين… إنت مش محتاج تخاف من سنك لان عشر سنين بينك وبينها مش كتير يعني ، ولا من أي حاجة.
إنت محتاج بس تبقى صادق في الموقف ده وتعترف لها
زين زفر بضيق:
— يعني أعمل إيه؟ أروح أقولها فجأة أنا جوزك؟
إيهاب هز راسه:
— لأ.
وبعدين ابتسم ابتسامة واثقة:
— اعزمها على العشا.
زين بصّ له باستغراب:
— عشا؟
— آه، في مكان هادي، رومانسي.
تكلموا بهدوء، حسسها بالأمان…
وبعدين اعترف لها.
سكت شوية وكمل:
— إنت لو سبتها تدخل جوا الجامعة كل يوم وتخرج من حياتك براحتها،
هتلاقي نفسك فعلًا بقيت عمو.
الكلمة وجعت، بس صحّت زين.
سند ضهره على الكرسي، عينه سرحت:
— لو رفضتني؟
إيهاب رد بثقة:
— على الأقل هترفضك وإنت راجل صريح،
مش حد مستخبي.
زين سكت، وبعدين قال بهدوء حاسم:
— خلاص…
النهارده.
إيهاب ابتسم:
— كده الكلام.
وزين لأول مرة من بدري…
حس إن القرار اتاخد،
وإن الليلة دي يا إمّا تنقذه…
يا إمّا تكسره.
—
زين عزم فيروز على العشا، وأول ما قالها حسّ بفرحتها من نبرة صوتها.
قلبها دق قبل ما ترد، وقالت بسرعة وهي بتحاول تبان هادية:
— طبعًا… أحب أجي.
لبست وراحت معاه، وهي جواها أمل كبير…
يمكن الليلة دي يقول.
المكان كان هادي، إضاءة دافية، موسيقى خفيفة.
قعدوا قصاد بعض، فيروز مبتسمة، وزين تايه.
الكلام واقف عنده، كل مرة يفتح بقه يرجع يقفله.
حاول يبدأ من حتة آمنة، ابتسم وقال:
— قوليلي… إيه مواصفات فتى أحلامك؟
فيروز ضحكت بخجل:
— كده فجأة؟
— دردشة بس… يعني.
فكرت شوية وبعدين بدأت تتكلم، من غير ما تبص له:
— يكون طيب…
مسؤول…
يخاف عليّ…
وأحس معاه إني متطمنة.
زين كان سامع، بس مش رابط.
هز راسه وهو بيبتسم:
— حلو. كمّلي.
رفعت عينيها وبصّت له بنظرة دافية:
— يكون ذكي، وناجح،
وشخصيته قوية بس قلبه حنين.
كل كلمة كانت فيه…
بس هو كان غرقان في خوفه.
ضحك بخفة وسأل:
— طب والسن؟
تحبي يكون عمره كام سنة؟
