رواية بقلم خلود ناجى
ـ نوح تعالي شوف النونو الجديدة
هالة ‘ انا قررت خلاص هجوز ابنك لبنتي
هنية بابتسامة: خلاص وانا موافقة
من كان يتخيل أن مجرد هزار بين اتنين صحاب من ٢٨ سنة يكون واقع في يوم من الايام ، وانا ونوح اتجوزنا ، الحقيقة انا كبرت من صغري علي أن نوح هو شريك في حياتي مش مجرد ابن صاحبة ماما الانتيم ، وهو كان بيعاملني برضوا علي الأساس دا ، انا بحبه من صغرنا وهو برضوا كدا ،رغم اختلاف طباعنا ، نوح جد اوي وشديد وشخص صريح وواضح في حياته وكمان دقة قديمة برضوا ، يعني عنده نفس تفكير الناس القديمة ، اللي هو مفيش حاجة اسمها خروجة مع زمايلي في الشغل ، مفيش داعي للخروجات الكتير ، البيت والعايلة هما اهم شي في حياتي ، اني اهلي اديهم بلا مقابل واعيش عشانهم بالمعني الحرفي بس في نفس الوقت يكون لينا رأينا الخاصة ، هو راجل بيرفكت الحقيقة ومثالي اوي من نظر الكل بس لو يبطل غيرته دي وأفكاره القديمة دي تتغير ، الحقيقة انا بحبه اوي بس نفسي يتغير شوية ، ودا سبب مشاكلنا كل يوم ، نوح عنيد اوي وعشان كدا مش بقدر اغير رأيه
ـ عشان خاطري يا نوح
” رؤي قولت مليون مرة مفيش شغل ، وبعدين يا حبيبتي أنتِ مش محتاجة الشغل في ايه ؟؟ بلاش تتبهدلي برا ، أنتِ تقعدي في بيتك واللي تطلبيه عيوني ليكِ يا ست البنات”
ـ يا نوح بحس بملل كبير والله في البيت وبفضل لوحدي
” اقعدي مع ماما ، انزلي شقتها واقعدوا مع بعض ، اعملي اي حاجة بتحبيها ”
ـ انت عارف اني بحب الشغل ، يا نوح عشان خاطري وافق واوعدك اللي تطلبه هعمله
” متأكدة ؟؟”
ـ متأكدة
” تمام موافق بس شرطي مفيش تجاوز حدود ، الشغل شغل وبس ، مش عايز هزار ، لو لاحظت الشغل اثر عليكِ هتسبيه علطول ولو ربنا كرمنا وخلفنا هتسيبي الشغل علطول ، صح متنسيش معادك مع الدكتورة النهاردة ‘
‘ نوح انا فقدت الامل في الخلفة الحقيقة ‘
” ربنا كريم …ادعي بس…هنزل انا الشغل وبكرا نطلع نغير جو ونتفسح مع بعض ”
ـ احلف بالله
ضحك ‘ والله يا ستي ‘
نوح دا حقيقي بطل حياتي كلها ، زوج لطيف مراعي وابن صالح و شخص كويس وجميل ، لو اتكلمت عنه من هنا لبكرة مش هخلص ، اهم حاجة اني اخيرا هشتغل ، الحقيقة انا محاسبة فقررت اشتغل محاسبة في شركة واحدة صحبتي رشحتني فيها .. . الشركة مش كبيرة اوي بس لا بأس بيها برضوا ، مؤهلاتي اعلي من كدا بس مش مشكلة بكرا وبعده همسك مكان كبير في الشركة دي ….
